Já, svaraðu!

Já, ég get bara ekki meir. Hættur, hef gefist upp, fallið, fuðrað upp sem Fönix í stó, grátið eins þeir sem þurft hafa að spila við Barnsley, furðað mig, hlegið, skammast og hnakkrifist.

En nú er það búið.

Ég segi hér með skilið við Blog.central.is

Metalmaniac er allur...            hér.















Ég hef ákveðið að þessi álkuháttur sem stjórnborð BC.is er henti mér ekki lengur, réttara sagt, þetta hentar ekki skapi mínu lengur.

Ég hef snúið mér að öðru bloggi.

Kíkið endilega inn á http://metal.blog.is/blog

Já, Áslaug, ég er kominn þangað!

Já og svo allir á Eagles-sjóið í Borgarleikhúsinu 19.mars!

Takk fyrir allt hér á þessum stað, vonandi sjáumst við á nýja staðnum

Ég var búinn að lofa einhverskonar glam-umfjöllun, vesskú!

Stutt en laggott.

Þið þurfið að eiga eftirtaldar plötur ef þið viljið skilja glam. Þetta er líka gott glam svo þið getið verið alveg óhrædd þegar þið smellið kvikindunum á fóninn/í spilarann.

Ein besta plata Mötley Crue er án efa Shout at the devil sem gefin var út í október 1983. Platan atarna seldist í bílförmum og partíljónin í bandinu fengu nóg af öllu, þið skiljið. Sex, drugs and rock and roll!

Ef þið fílið Crue eftir þessa hlustun þá er ráð að hlusta á Dr. Feelgood, þeirra besta verk segja sumir og pródúseruð af Bob Rock sem pródúseraði m.a. nokkrar Metallica plötur.

 

 

 

Þessu næst væri ráð að athuga með Cinderella, já, ég meina það! Þetta band á nokkrar þrusugóðar plötur og nokkur hræðileg hártímabil! Platan þeirra Night songs er helvíti góð og fínt fyrir ykkur að komast í partígírinn með hjálp þessarar plötu. Þeir gáfu svo út nokkrara ágætar plötur en hættu svo skyndilega. Þeir hafa eitthvað daðarað við ríjúníonið og við hljótum að fagna því, ekki satt?

 

 

 

 

 

 

Að lokum, Ratt. Platan Dancing undercover er klisja út í gegn. Hárið, gítararnir, meiköppið, ...sjæse! Lagið Dance hljómaði víða, m.a. á fróni, skoðið myndbandið hér.

 

 

 

 

 

 

Nú eruð þið komin með fínt start. Njótið vel og ef þið hafið tíma til að lesa meiri vitleysu þá getið þið kíkt hingað.

Þangað til næst, adios.

Datt inn á www.tonlist.is og fann þá þetta líka snilldarmyndband,

...þetta er bara fyndið, tjekk itt át! http://www.tonlist.is/Video/ViewVideo.aspx?VideoID=1357

Annars er kominn nýr meirhluti í borginni og ég er alls ekki sáttur við þessa stjórn. Örvænting Sjálfstæðisflokksins er svo ótrúleg að hún slær jafnvel út bölvaða vitleysuna í Framsóknarflokknum sl. ár.

Æji, jæja, Dagur verður bara borgarstjóri seinna, ...vonandi.

Best að hugsa eitthvað fallegt núna.

 

Gleðilegt nýtt ár og takk fyrir árið.

Ég hef ekki verið duglegur að skrifa, rétt, en það eru ástæður fyrir því.

Í fréttum er...

Í fyrsta lagi: ég er nýbyrjaður í tveimur nýjum vinnum. Bara gaman að því og það gengur bara andskoti vel.

Annað lag: Elísabet fer til dagmömmunnar Ragnheiðar á daginn og er ekkert spennt fyrir því, grenjar bara og öskrar, oftast. Er allt að batna...  

Þriðja lag: ég skrifaði hér jólakveðju og nánast ENGIN svaraði kveðjunni svo ég taldi að ykkur væri bara andskotans sama hvort ég skrifaði eður ei. Halló?

Fjórða lag og nú brjálast Anna Júl. : Óli Stefáns er ofmetnasti leikmaður íþróttasögunnar. Ef þið eruð ekki sammála, rökstyðjið. Ef þið viljið rökstuðning frá mér, spyrjið og ég skrifa.

Fimmta lag: Paradise by the dashboard light með Meatloaf.  þetta er klassíker og engan veginn neikvætt lag.

Ekki fleiri lög.

Man.Utd. komið á toppinn á Englandi og þar verður liðið vonandi áfram. Arsenal gæti strítt okkur eitthvað áfram en Liv.Púl getur ekki rassgat eins og venjulega og það er svo gaman að því að ég er að deyja úr hlátri sem ég rita þetta, akkúrat núna.

Tommy Lee á leiðinni með DJ-græjurnar og ég ætla ekki að fara á Nasa til að sjá þau ósköp. Það væri hinsvegar einstaklega gaman að hitta kauða og smella á hann svo sem eins og einni al íslenskri kveðju. VELKOMINN MR. LÍ, svona til að herma eftir Villa litla fyrrv. Borgarstj. En þegar hann tók á móti Yoko Ono þá sagði hann svo eftirminnilega: „velkomm miss vonn”

Takk fyrir í bili.

Já, gleðileg jól aftur og takk fyrir að allar kveðjurnar. Þeir sem ekki fengu jólakort frá mér þessi jólin fá bara kort næst, ekki fara að grenja.

Jólaundirbúningurinn fór vel af stað. Eftir að konan komst í jólafrí veiktist hún af skæðri, óskemmtilegri flensu sem varð til þess að kjéddlíngin lagðist í rúmið og var þar í u.þ.b. vikutíma. Hún er að verða góð núna takk fyrir. Dóttir mín fékk sinn skerf af flensunni líka. Þær tvær hafa verið mjög skemmtilegar. Jólaundirbúningurinn bar því svolítinn keim af því að ég fór einn í matvöruleiðangur rétt fyrir jólin, Berglind reyndi að fjarstýra mér út um kvipp og kvapp en ég gleymdi miklu.

Hádegi á Þorláksmessu. Flestir að horfa á leik eða slafrandi í sig skötu með hamsatólg og lauk, ykkar einlægur að setja upp snaga í svefnherbergi okkar hjónaleysa... þrjú skrúfugöt komin, one to go... miðað, tekið í gikkinn... fer vel af stað, allt beint, allt eðlilegt, allt þar til... vatn... mikið vatn kemur bunandi út úr veggnum... blót og ragn... áfall... ég virtist hafa borað í vatnslögn... ekki heitt vatn sem betur fer...

Eftir áfall, símtal við tryggingar og píparavesen, samtal við verktakann sem byggði húsið og eftir að hafa tekið allt kalt neysluvatn af húsinu, nágrönnum mínum til einstakrar jólagleði, allt í hádeginu á Þorláksmessu, kom s.s. í ljós að um „dautt” rör var að ræða, 25 mm rör sem notað var til að halda hita á steypunni þegar húsið var steypt í gríðarfrosti á sínum tíma. Þeir bara „gleymdu” að tæma rörið áður en þeir „drápu” það. Parketið mitt blautt og þetta er bara eitthvað dautt rör? Frábært, ég var þá ekki búinn að eyðileggja einhverja vatnslögn? Nei, því betur. Þetta er þess vegna bara gaman svona eftir á...

Núna er gat á svefnherbergisveggnum mínum, stórt, eftir að píparinn reyndi að komast að því hvaða andskotans rör hýsir vatn í hæðinni 170 cm, í miðjum vegg!

Ég ætlaði að skrifa um glam brilljans en það verður bara í næsta bloggi, Glam-Metal-Brilljans!

Þangað til verðið þið bara að hafa það gott og ekki bora í veggi í hádeginu á Þorláksmessu.

Jæja, lömbin mín.

Þá eru það jólin 2007, þetta er fallegt. Daginn farið að lengja og sumarið á næsta leyti eða hér um bil. Pakkarnir komnir undir furuna og kortin tilbúin til aflestrar. Djollí, djollí.

Takk fyrir að vera til og vonandi sjáumst við hress fljótlega, með laufabrauð í vinstri og KISS plötu í hægri.

 

Gleðileg jól

Axl Rose var helvíti sprækur með garðslönguna þegar eldar loguðu í þakskeggi hallarinnar ógurlegu sem hann kallar heimili sitt. Það er auðvitað bara rokk að sveifla garðslöngunni og berjast við vítisloga! Annars er það að frétta af Guns ´N Roses að platan þeirra, Chinese Democracy var kosin plata ársins af tímaritinu Classic Rock. Platan er ekki komin út og því er þetta ansi sérstakt, þeir dæma s.s. plötu sem var lekið á netið fyrr á árinu. (hvert erum við að stefna?) Skríbentar CR telja að um meistarastykki sé að ræða og þá er bara hugsa fallega til Axl Rose og vona að plötukvikindið komi út fyrr en síðar.

Kevin Dubrow söngvari Quiet Riot er allur og er þess vegna bara fyrrverandi söngvari QR... allavega, hann var víst búinn að liggja einhverja sex daga áður en hann fannst og nú er búið að staðfesta dánarorsökina: óverdós á kóki, ekki svalt. Kevin var þekktur kjaftaskur, átti það til að rífa kjaft um allt og alla í viðtölum. Ástæðuna taldi hann vera að hann fékk sér í nös eins og allir (já, já...) en hans mistök voru að fá sér í nös fyrir viðtöl... duh, og svo dó hann bara einn eftir þrusu kojupartí, frekar sorglegt. Hann stofnaði QR með Randy Rhoads, ofurgítarhetju árið 1975 og helsti smellurinn þeirra var kover af Slade-aranum „Cum on feel the noize” árið 1983. Rokk on!

Skid Row drengirnir sem heimsóttu oss í byrjun mánaðarins eiga í deilum við fyrrum söngspíru sína, Sebastian Bach. Deilan er heimskuleg og engan vegin á hreinu, gaman að því. Seb vill nota nafnið sjálfur en þeir segja bara nei, nei, nei... Blow it out your ass var víst eitt kommentið sem flaug!

KISSOLOGY III er komin út. 5 diska special ed. er fáanlegt en annars er þetta 4 diska pakki. Þetta er svo svalt og ég get ekki beðið eftir mínu eintaki! Með hverjum pakka fylgir svo bónus diskur, um 3 bónus diska er að ræða.

Eru ekki allir jafn spenntir og ég?

Jú, það eru allir jafn spenntir ☺

Rokk og ról!

Já, já...byrjum þá.

Ef frá er talið gaul og glamur nánustu ættingja minna, svona læf og ómixað, þá eru plöturnar hennar mömmu helstu áhrifavaldarnir hvað tónlist varðar í mínu lífi. Deja Vu plata þeirra CSN&Y hafði gífurleg áhrif á ómótaðan hug kindastráksins. Melódiskar gítarlínur og úbersvalur söngur drógu heillaðan krakkaskítinn inn í litadýrð hippatímatímans og rokks ársins 1970. Geðveikt! Svo var stokkið yfir í Beach Boys og Jan and Dean, Surfin´ USA platan (safnplata) var dýrgripur. Pipeline ofl. frábær Kaliforníu lög virkuðu einstaklega vel í sumarstemmningunni í Kinn. Bara cool. Og ekki má gleyma Hljómum, Stuðmanna plötunni „Sumar á Sýrlandi” og Janis Joplin. Hvernig var hægt að gera nokkuð annað en að spila plötur og stara á albúm kover? Takk gamla mín fyrir að eiga þessa dýrgripi.

...og þá er það Deep Purple kaflinn.

Þetta band er óendanlega frábært. Þeir eru búnir að gefa út stórgóðar plötur sl. 40 ár og nýjasta platan er líklega ein þeirra besta þannig að þeir eru ekkert að gefa eftir.

Seint mun sveitakvikindið gleyma því þegar ónefndur snillingur sagði: „hva´ hefurðu aldrei heyrt Smók onþe voter?” Ég varð grænn af skömm og varð að hrista hausinn, jánkandi því að hafa aldrei heyrt lagið dýrlega. Þessi snillingur gaf mér þess vegna mína fyrstu Deep Purple plötu, „Live in London 1974”. Vaaáá... þessi plata er ROSALEG, ...enn í dag. Blackmore fer á þvílíkum kostum á gítarnum að ég get bara ekki gúdderað neina aðra útgáfu af Smoke on the water eftir þessa snilld! ...eða svona næstum því. Ég keypti mér svo hverja DP plötuna á fætur annari. 24K Purple, Live 70/72 o.s.frv. Þegar ég svo loksins sá DP í fyrsta sinn árið 2005 hélt ég að ég myndi springa. Þeir voru svo góðir þetta kvöld að þegar ég kom heim var engu líkara en ég væri í enhverskonar vímu, ég heyrði ekki hálfa heyrn, stundi bara einhverja þvoglukennda lýsingu af tónleikunum yfir Berglindi sem hlæjandi hellti uppá kaffi handa kédlinum. Tekið skal fram að hér var EINGÖNGU um tónlistar-high að ræða!

Þeir voru svo ekki síðri þegar ég sá þá á „Rapture of the deep” túrnum en platan ROTD er svo átakanlega góð að hver og einn verður að eignast gripinn. Gillan gamli hefur aldrei verið betri hvað textagerð varðar og ég tel að röddin hafi ekki verið í betra formi hjá honum svo áratugum skipti.

Þetta band er bara brill og ef þú lesöndin mín hefur ekki haft vit á því að hlusta á Deep Purple en sýnir því þó áhuga, þá eru hér nokkrar góðar plötur fyrir þig að kaupa strax. Ég ábyrgist snilldina.

In Rock
Machine Head
Made in Japan
Live in London 1974
Perfect Strangers
Rapture of the deep

Svo má líka alltaf kaupa safnplötu með þeim

Adios!

...að vinna Liverpool

Liverpool 0-1 Man.Utd.

Það var að þessu sinni mark frá meistara Tevez sem tryggði sannfærandi sigur á erkifjendunum. Sanngjarn sigur vegna þess að það þarf að skora mörk til þess að vinna leiki.

Van Der Sar átti nokkur glæsileg mistök sem minntu á klúður hins pólska Dudek en munurinn var að Forlan refsaði Dudek á sínum tíma en enginn púllari gat refsað Van Der Sar í dag.

Óhemju vond taktík Benítez hjálpaði United mönnum óneitanlega, þeir reyndu allan leikinn að komast framhjá boltahræddum bakverði United, innkastshetjunni Wes Brown, en mistókst herfilega. Takk fyrir Benitez að reyna ekki neina aðra leið að marki United.

Vidic og Rio voru klettar í vörninni, Anderson og Owen voru feykiöflugir á miðjunni og Kewell og hvaðhannnúheitir voru skemmtilega lélegir og ekkert nema hlægilegt að sjá þá rembast líkt og rjúpur við staur fram eftir leik. Að sjálfsögðu voru þeir teknir útaf um leið og Benni Tez fattaði að þeir voru aðhlátursefni áhorfenda. Babel kom inná og var betri en helmingur Liverpool-liðsins, hreint út sagt furðulegt að hann sé ekki byrjunarliðsmaður, ótrúlegt. Gerrard var fínn en gat ekki virkjað meðalmennina, samherja sína, sem sofandi sigldu að feigðarósi. Giggs var traustur, Evra ógurlegur, Rooney ógnandi allan leikinn og aðrir leikmenn United til fyrirmyndar á erfiðum útivelli.

Niðurstaða: Man.Utd. er betra en Liverpool. Liverpool verður að halda áfram á sömu braut og þá verður allt í góðu lagi fyrir öll hin liðin í deildinni. Torres getur ekkert á Englandi, Gerrard á eftir að rítæjera án þess að vinna ensku dolluna. Giggs er hetja.

Hér má sjá mark Tevez og ráðþrota varnarmann Liverpool, stjarfann, stara á boltann.

Látið kommentunum rigna inn...

DC++, Istorrent, thevikingbay, thepiratebay o.s.frv. o.s.frv. Það eru til óteljandi margar vefsíður þar sem þú getur niðurhalað tónlist, myndefni ýmiskonar og öðrum ó/þarfa. Einhverjir vilja stjaksetja þá sem bera ábyrgð á þeirri villimennsku að setja höfundavarið efni á netið öðrum til afnota. Til eru þeir sem meira að segja væru til í að brennimerkja greyin, handleggsbrjóta og nefskera, táhöggva og aflima.

En af hverju? Hvað í andskotanum gagnast það að afhausa greyin?

Smáís og allir þeir sem vilja drepa og gelda í nafni „réttlætis” og í „þágu” listamanna, lesið nú.

Sú aðgerð að dreifa efni „ólöglega” hefur þrifist frá því að prentvélin fór í framleiðslu. Hvort sem menn prentuðu bækur án vitundar höfundar (ég t.d. efast um að Marco Póló hefði brosað í kampinn hefði hann lesið nokkrar af þeim skrumskældu útgáfum sem litið hafa dagsins ljós af ferðasögu hans eftir að hann geispaði golunni), eða tóku upp á stálþráð lög úr útvarpinu (ég er að tala um rokktímabilið1964-70), þá hefur þetta bara viðgengist og mun alltaf viðgangast.

Þetta er ekki alltaf alslæmt. Ef Steini rótari hefði ekki brennt fyrir mig diskinn Oceanborn með Nightwish ...þá hefði ég kannski ekki orðið þeirrar gæfu aðnjótandi að KAUPA alla diskana þeirra og ferðast sérstaklega til Köben til þess eins að sjá bandið á ONCE túrnum árið 2005. Smári bekkjarbróðir væri líklegast réttdræpur núna því hann tók upp á hljóðsnældu fyrir mig Painkiller plötu Judas Priest árið 1991. Ég er bara búinn að kaupa þá plötu tvisvar síðan þá, fyrst á original cd og svo á endurhljóblönduðum cd. Smári minn, varaðu þig, kæra er e.t.v. yfirvofandi.

Er svo bara allt í lagi að íslenskar verslanir selji plötur útlenskra listamanna á okurverði? Fá listamennirnir borgað í samræmi við verðlag á Íslandi? Tökum dæmi. Queen Live at Wembley, 2 disc DVD. Á Amazon.com fæst varan á $12.99 sem reiknast sem kr.805,38.- ef við notumst við $1 sama sem kr.62. Við leggjum svo á þetta tollafgreiðslugjald (eins gáfulegt og það nú er) og virðisauka og einhverjar krónur að auki til ríkis og pósts, allavega, eigum við að segja að frá Amazon gæti pakkinn með Queen kostað ca. kr.1500.-? Sátt? Ókey, ég kíkti í Hagkaup um daginn og rak augun í umræddann disk, þar kostaði kvikindið kr.3299.- mér leið hreint út sagt illa. Ég hafði tölvupóstsamband við Hagkaup og vildi fá að vita hvert innkaupsverðið á disknum væri en hef enn ekki fengið svör. Ég hringdi í Skífuna og fékk uppgefið hjá starfsmanni verslunar á Laugavegi að diskurinn kostaði kr.3999.- hjá þeim. Ég kvaddi pent og kurteisislega. ER EKKI ALLT Í LAGI? FÁ MEÐLIMIR QUEEN EITTHVAÐ AF ÞESSARI ÁLAGNINGU? Hver græðir? Við sem neytendur? Smáís og þeir sem vilja endilega beygja niður og loka á þessa ljótu, ógeðslegu, illþefjandi niðurhalara ættu kannski að skoða aðeins hverjir það eru sem í raun skíta á tónlistarmenn.

Ég gæti haldið áfram í alla nótt en ef þú hefur lesið alla leið hingað niður þá ertu væntanlega alveg að gefast upp þannig að nú fer ég að hætta.
Menn verða bara að átta sig á því að t.d. í mínu tilviki þá kaupi ég allt sem ég vil eiga. Mér er það allsekki nóg að fá plötu á hljóðsnældu, MP3, wave eða einhverju öðru formatti. Ég vil bara CD með hulstrinu og öllum pakkanum. Já, ég næ mér í efni á netinu, hlusta og ákveð síðan hvort ég vil eyða kr.500 – kr.1500.- í alvöru cd á Amazon því ekki kaupi ég plöturnar hérna heima á íslenskum fúllprís, ég hef bara ekki efni á því. Ef platan sökkar þá hendi ég kvikindinu úr tölvunni eftir niðurhal og kaupi hana ekki.

Takk fyrir að lesa esskuddnar mínar, best að hætta núna...

Af hverju fer fólk að vinna í sjónvarpi? Sumir sem vinna í sjónvarpi virðast vera fæddir til að babla og sýna sig á skjánum en svo eru aðrir sem hella bara yfir mann aulahrolli og enn aðrir sem hreinlega fá mann til að vilja skæla sig í svefn með bauk af sljófgandi í annari og dollu af miltisbrandi í hinni. Þeir sem eru til fyrirmyndar í kassanum eru vel talandi, myndast vel og eru auðmjúkir. Edda Andrésdóttir er dæmi um asfbragðs skjámann. Ragnhildur Steinunn er sjarmerandi og núorðið ratar sjaldan kolvitlaust orð út úr hennar munni. Þóra Kastljós er líka alveg ágæt og Bjarni Fel er ennþá bestur í fótboltanum. En þeir sem fara í taugarnar á mér fara svo illþyrmislega í þær að mér hættir við að lenda í hörku orðarimmu við sjónvarpið mitt, ég jafnvel hreyti í áttina að greyinu ósæmilegu orðagjálfri sem það ekki skilur og sé svo eftir öllu saman.

En lítum nánar á málið og skoðum örfá dæmi. Elín Hirst, ég hef enn ekki séð fréttatíma þar sem hún ekki hnýtur um hið íslenska orð eða stoppar í miðri setningu, orðvana og hrædd á svip. Þetta kann að stafa af því að sá sem stjórnar skjátextaverplinum þyki óstjórnlega gaman að stríða Elínu en ég tel það harla ólíklegt, ég myndi ekki nenna að bulla í henni í svona mörg ár. Valtýr Björn, íþróttafréttaritari er því miður með þeim meira þreytandi í bransanum. Ég er ekki með áskrift að Sýn eingöngu vegna þess að ég get ekki hlustað á rausið í honum við NBA lýsingar. Fyrirgefðu Valtýr, þú ert ábyggilega ágætur og þú heldur m.a.s. með LA Lakers en ég bara get ekki hlustað á þruglið í þér. Heimir Karls og einar Bolla voru alveg glimrandi í lýsingum á NBA boltanum og það kemst enginn með tærnar þar sem þeir hafa hælana. Punktur og basta.

Nei, heyrðu mig nú Þrási minn, telur þú þig geta gert betur sem sjónvarpsstjarna? Nei, það held ég bara alls ekki. Ég á það nefnilega til að troða báðum fótum upp í mig og öllu skótauji heimsins með. Mér tekst alveg hreint bjánalega oft að segja einhverja vitleysu þegar hún á alls ekki við.

Dæmi: Kennari og nokkrir aðrir starfsmenn Blindarskólans koma í heimsókn í skólann þar sem ég kenni og af einhverri óþekktri ástæðu er bankað á dyrnar á stofunni minni þar sem ég er að kenna 5.bekk. Gestirnir labba inn og kynna sig, ég tek í höndina á blindri konu, kynni mig og segi „gaman að sjá þig”. Konan svarar: „já, einmitt, sömuleiðis vinur minn”. Hún heldur áfram, „hvað gerir þú hér í skólanum”? „Ja, ég er nú bara hér til að hafa auga með krakkagemlingunum. Konan brosir og biður um útskýringar á verkefni dagsins í skólastofunni. Ég að sjálfsögðu treð öllum nálægum fótum upp í mig og svara: „krakkarnir eru núna með „sýnum og segjum frá” dag og eins og þið sjáið þá eru þau að verða búin, þau er s.s. að sýna hvert öðru þessi glæsilegu verkefni.

Þið skiljið hvert ég er að fara.

Vonandi verður enginn sár við mig...

Aldregi hebbði mig grunað að Finnar væru svona yfirmáta dramatískir. Eins og ALLIR vita þá var Tarja Turunen rekin úr Nightwish eftir síðustu tónleika sveitarinnar á ,,Once´´ túrnum. Hún fékk bréf (sem einnig var sent fjölmiðlum og sett á netið ), og hún kvödd og útötuð skít og skömmum fyrir að vera óalandi og óferjandi og ég veit ekki hvað og hvað.

Svo gefur hljómsveitin út plötuna Dark Passion Play og þar er sungið í laginu Bye, bye beutiful:

Did you ever hear what I told you?
Did you ever read what I wrote you?
Did you ever listen to what we played?
Did you ever let in what the world said?
Did we get this far just to feel your hate?
Did we play to become only pawns in the game?
How blind can you be, don’t you see?
You chose the long road, but we’ll be waiting

Marco syngur þessar línur sem eru augljóslega dúndurskot á fyrrverandi söngspíru.

Tarja var svo að gefa út sína fyrstu plötu eftir viðskilnaðinn og heitir gripurinn My winter storm eða ,,Vetrarstormur´´ (stórkostlegur titill) en þar er að finna lagið I walk alone og þar syngur Tarja:

Go back to sleep forevermore
Far from your fools and lock the door
They're all around and then it's sure
You don't have to see what I turn out to be

No one can help you

I walk alone,
Every step I take, I walk alone
My winter storm, holding me away
It's never gone
When I walk alone

Waiting up in heaven, I was never far from you
Staring down, I felt your every move

 

Ég tel að við þurfum ekki að bíða þess lengi að Tarja og Nightwish sameinist að nýju (sniff, sniff...).

En eins og Marco, bassaleikari Nightwish, sagði svo eftirminnilega: Suck my f%/king Geysir!!!

 

Ég hef verið að hlusta á þessa plötu sl. daga. Skrifaði svo plötudóm sem þið fáið nú að lesa. Já, já, gaman að þessu er það ekki?

Fyrsta plata Benny Crespo´s Gang er komin út. Á plötunni eru níu lög og eru þau öll eftir hljómsveitarmeðlimi. Bandið er undir sterkum áhrifum frá Mars Volta en einnig má greina áhrif frá Primus og jafnvel ,,gömlu góðu´´ Red hot chili peppers. En það sem mestu máli skiptir er að þetta er skemmtilegur og frumlegur bræðingur tónlistarstefna sem þau gera algerlega að sínum. Rokk, metall, britpopp, eitís, þetta er allt saman hér. Lögin eru melódísk og um leið framúrstefnuleg. Í hljómsveitinni eru flinkir spilarar sem fara vel með lögin og sleppa alveg við stóru hættuna sem er yfirspilun. Allir meðlimir taka að einhverju leyti þátt í söngnum sem er hið besta mál en Helgi Rúnar og Lovísa sjá þó að langmestu um þann þátt. Þau eru bæði með flottan og einlægan söngstíl. Next weekend er frábært lag með flottum melódíum og þéttri spilamennsku. Lagið er nettur Sykurmoli en með gallsúrum gítarlínum sem gera þetta að enn skemmtilegri tónsmíð fyrir vikið. Come here minnir á stemmninguna hjá Portishead en er bara miklu betra, uppbygging lagsins er hæg en heldur manni alveg dáleiddum. Running er mikill rokkari og inniheldur eitt mest grípandi gítarriff sem ég hef heyrt lengi. Ég hlakka til að heyra það læf. Conditional love er eitt af betri lögum plötunnar, þarna kemur best í ljós hve góð hljómsveitin er að blanda saman drífandi gítarrokki og blíðum melódíum. Maður sogast inn í lagið og vill bara vera þar. Textarnir eru flestir mjög góðir, ástarlagið Conditional love er þó með áberandi góðan texta sem Helgi Rúnar og Lovísa skila vel frá sér. Niðurstaða: góð lög, stórskemmtilegar sándpælingar og góður heildarhljómur gerir þetta að einni af betri plötum ársins.

Þar hafið þið það!

Ég segi: kaupið plötuna.

...í dag!

Elísabet er orðin eins árs!

Það er nebbilega það...